#Nematimes булангийн өнөөдрийн зочин
Б.Мөнгөнзаяа.
Намайг Батнасангийн Мөнгөнзаяа гэдэг. Эхнэр, хоёр хүүхдийн хамт Дундговь аймагт амьдардаг. Онцгой байдлын албанд 20 дахь жилдээ жолоочоор ажиллаж байна.
Ер нь жолооч хүний үүрэг их, хариуцлага өндөр. Хамгийн чухал үүрэг бол хаана, хэнтэй ч явсан хүний итгэлийг даадаг байх. Ослын голомтод аврагч нарыг түргэн шуурхай, осол эндэгдэлгүй хүргэх, гал түймрийн дуудлагаар ажиллах үед усны даралтыг тохируулж, усаар дутаахгүй байх гээд асар том хариуцлага, эрхэм хүндтэй үүрэг хүлээдэг. Голомтод ажиллаж байгаа аврагч, гал сөнөөгчдын хувьд ч ард нь байгаа жолооч, арын албанд ажиллаж байгаа нөхөртөө итгэл дүүрэн байж аврах ажиллагаа амжилттай болдог байх.
Хүний амьдрал баялаг болохоор олон төрлийн хоббитой. Чөлөөт цагаараа авто спортоор хичээллэж, мод төмрөөр эд зүйл урлах, фото зураг авах, зураг зурж, юм оёх дуртай. Эхнэр маань аймгийн төвд “Ембүү” зоогийн газар ажиллуулдаг. Амт чанартай хоолоор хүмүүст үйлчилнэ гэдэг, бусдад тусалдаг, сайн мөр дагуулж байдаг онцгой албатай минь ижил хүмүүнлэг ажил гэж бодож эхнэрээрээ бахархдаг.Миний хувьд “Нарантуул” зах, “Бөмбөгөр” худалдааны төвийн гал түймэр, Налайхын замд гарсан 45 хүний автобусны осол, Дундговьд 2021 оны гуравдугаар сарын 4-ний өдөр болсон шороон шуурга зэрэг томоохон дуудлагуудад үүрэг гүйцэтгэж байсан. Эргээд бодоход эрхэлсэн ажилдаа мэргэшиж, хамтран ажилладаг хүмүүсийн маань итгэл надад ажлаа урам зоригтой хийх хөшүүрэг болдог учраас жолоочийн ажлаасаа уйдах завгүй 20 жилийг өнгөрүүлж дээ.
Хүндэтгэсэн: Дундговь аймгийн Онцгой байдлын газрын Гал түймэр унтраах аврах 25 дугаар ангийн гал түймэр унтраах автомашины жолооч, ахлах ахлагч Б.Мөнгөнзаяа
https://nema.gov.mn/n/148392 See less